توني ادري ان في رنيه ولامين غير ال حامد يقال لهم ال عمير

[ولد حموله]

السلام عليكم
توني ادري ان في رنيه ولامين غير ال حامد يقال لهم ال عمير
وش يرجعون ال عمير من الولامين
وينهم في شجرة نسب قبيلة الولامين
ومنهم بني عمهم في الوادي
ومن متاهم في رنية
ويشهو سبب مجيهم لرنية
ومنهم مناسبين في رنيه
وهل هم بدو هل ابل ويشهي ابلهم ويشهو وسمهم ؟

ابي اجابه وافيه من هل الشان والعرف لو تكرمتو ؟

[كجا مغلي]

كان ودي اني انفعك بس الوداعين ماشالله عليهم في كل ديره حتى في العراق

تقبل مروري

تحياتي

[2في1]

سوف تجد من يرد عليك
بس تعرف مثل هالامور لابد من المعرفة او السؤال
صبرجميل وابشر بالخير

[راعي الجردا]

ولد حموله ,,,

فيه ألف طريقه وطريقه للأستسفار عن أصلهم وفصلهم ,,

ولكن لاتصل الى طريقة الاستفزاز ,,

وجزاك الله خير عن دفاعك عن ربعك وجماعتك بس ونا خوك رنيه فيها دواسر مثل مافي الوادي سبعان ,,

والدواسر ونا خوك في كل ديره ,,
ويشيخون على هل الديره ,,

وتقبل مروري

[saad2008]

السلام عليكم ورحمة الله وبركاته

يا (ولد حمولة)!

اللهم لك الحمد والشكر على ما اعطانا من جميع النعم خاصة نعمة العقل والتعامل مع الأخرين .

نعم بالفعل -- إنت ما تدري -- مثلي أنا تماما أنا ما أعرف ربعك اللي ذكرتهم في رنية ولا عمري سمعت بذكرهم-- ولكن -- إذا هم من الولامين والنعم فيهم أو لأي فخذ كانوا يرجعون - لأن كلن أبخص وأعلم بنسبه -- ولا نقلل من قيمه أو شأن أحد لأن ( الناس مأمونون على أنسابهم )0

وردا على إستفسارك وأسألتك والتي لا أعلم مغزاها -حيث طريقة الأستفسار-فيها نوع من التنكير- وليست- مستفزه ولكن هذا اسلوبك -بالرغم من هذا كله سوف أجاوبك0

آل عمير الدواسر ( في رنية والأفلاج وتربة)
هم من الولامين -أباً عن جد- وهم أحفاد ( حمد - سعود - وبراهبم - عبدالله) أبناء عمير بن سعد بن حسن بن محمد بن ولمان بن غانم بن ناصر بن ودعان0 وعمير هذا اخو عريعر بن سعد بن حسن بن--------- وعريعر هذا له درعان(ال درعان - اللي ما غيرهم) اللي الأماره عندهم والعمودية- وله غلفص( ال غلفص اللي ما غيرهم وغنيين عن التعريف) وحياك الله في أي وقت عشان تشوف وينهم من شجرة الولامين.

ومعروفين عند بنوعمومتهم الولامين جميعا أمثال ( ال مروان ال مصري ال نايف ال صقر ال وسام ال علي ال حسن وال وادي وجميع أسر الولامين اللي ما ذكرتهم)

وأسأل عن الشيخ محمد بن سعد بن عمير في رنية وأخوته وبنوعمومته( عبدالله- فهد- عمير - أبناء عايض بن ناصر)أو أي واحد من ال عمير- فهم من الرجال المحسوبين على مستوى القبيله أوحتى مع القبائل اللي حولهم بحكم تواجدهم -ومعروفين بالمحافظه على الدين والتقاليد الحميدة0

وفيه تواصل بينهم وبين جميع الدواسر في الوادي والخرج والأفلاج.

ومن ناحية الأبل الله يحييك في رنية وتشوفها وندعوك دعوة خاصة ووسمنا وسم الولامين المشغارy -على الرقبة- مع قناعتي بأنها ليست مقياس سواءاً عندنا ولا ما عندنا!!!

ومن ناحية - بدو ولا غيره - هذه أتركها لك- لقناعتي انه لا يوجد بدوي بمعنا هذه الكلمه في وقتنا الحاظر- وانت توافقني الرأي0

ومن ناحية من ناسبو (مناسبين رجال عليهم الكلام ومعروفين و قبيليين أصل وفصل) وكنت أتمنى لو حظرت أحدى مناسباتنا - اللي تخص الدواسر أو نسب أو أخرى0

ومن ناحية وش اللي جابهم في رنية - وش رأيك انت !!! وين تبيهم يروحون !!! بس نطمنك ربعنا وجماعتنا في كل مكان في حدود الدواسر وغيرها - طيب وش رايك بالدواسر اللي في القصيم والرياض ومرات والشرقيه وغيرها-وربعك وش جابهم في رنية وين تبيهم يروحون؟ يا هداك الله0

ولا فيه أحد يحبذ الحديث عن النفس - حيث يفضل الغير- ولكن أجبرتني جعللك تسلم- فأرجو اني طيبت خاطرك ونحن سعداء بمعرفتك في المستقبل وهذا الموقع الطيب اللي يقرب أبناء القبيله من بعض ونتعارف على بعض- خاصة عيال ولمان0

وصدقني إني أحترمك لأن سؤالك يدل على حرصك على نسب العوائل والأسر -خاصة الولامين مثل حرصك علينا وودك تعرف من نكون-ولمعرفة المزيد اتمنى التواصل معي- وشكرا لك.

بس لي ملاحظه ( وينك ووين ربعك!!!! في الحفل الكبير الل كلن حظره- دوسري او من القبائل الأخرى- يوم زيارة شيوخ الوداعين وشيوخ الولامين في رنية عند ربعهم وعيال عمهم ال عمير اللي تنشد عنهم ).حسب علمي ما يخفاك شي في رنية!!!!

تقبل تحياتي - من صاحب الشأن والعرف -

هذا وصلى االله على أشرف من طلعت عليه الشمس نبينا محمد بن عبدالله عليه أفضل الصلاة والسلام